ຫວ່າງບໍ່ດົນມານີ້ ທີ່ຫ້ອງຮັບແຂກຂອງພະແນກສຶກສາທິການ ແລະ ກິລາ (ສ​ສກ) ແຂວງສະຫວັນນະເຂດ, ໂຄງການສົ່ງເສີມເດັກນ້ອຍທຸກຄົນເຂົ້າຮຽນໃນຊັ້ນປະຖົມສຶກສາໄລຍະ II (LEAPSII) ໄດ້ມອບອຸປະກອນໄອທີຊ່ວຍເຫຼືອເຂົ້າໃນວຽກງານການສຶກສາທິການ ແລະ ກິລາແຂວງສະຫວັນນະເຂດ ຊຶ່ງປະກອບມີ: ແລັບທັອບ ຈໍານວນ 4 ຊຸດ, ເຄື່ອງພິມເອກະສານຈໍານວນ 4 ຊຸດ, ເຄື່ອງສາຍໂປເຈັກເຕີ ຈໍານວນ 2 ຊຸດ ແລະ ອື່ນໆ... ລວມມູນຄ່າ 129.236.000 ກີບ. ໃຫ້ກຽດມອບໂດຍ ທ່ານ ນາງ ລໍເລັນ ເບວ ຜູ້ອໍານວຍການໂຄງການສົ່ງເສີມເດັກນ້ອຍທຸກຄົນໄດ້ເຂົ້າຮຽນໃນຊັ້ນປະຖົມສຶກສາໄລຍະ II (LEAPSII) ແລະ ກ່າວຮັບໂດຍ ທ່ານ ສີອຸດອນ ທອງສຸວັນ  ຮັກສາການຫົວໜ້າພະແນກສຶກສາທິການ ແລະ ກິລາແຂວງ, ມີບັນດາຫົວໜ້າຂະແໜງ-ຮອງຫົວໜ້າຂະແໜງ, ພະນັກງານທັງສອງຝ່າຍເຂົ້າຮ່ວມ.

 ໂອກາດນີ້, ທ່ານ ນາງ ລໍເລັນ ເບວ ໄດ້​ກ່າວວ່າ: ຍ້ອນເຫັນໄດ້ສະພາບຄວາມຈຳເປັນໃນວຽກງານການສຶກສາຂອງແຂວງສະຫວັນນະເຂດໃນເຂດຊົນນະບົດ ແລະ ຫ່າງໄກສອກຫຼີກໃນ 7 ເມືອງເປົ້າໝາຍ ເຫັນໄດ້ວ່າຂາດ​ເຂີນ ອຸປະກອນໄອທີ ທີ່​ນໍາໃຊ້ເຂົ້າກັບວຽກງານການສຶກສາເປັນຈໍານວນຫຼາຍຢ່າງ.

 ທ່ານ ສີອຸດອນ  ທອງສຸວັນ  ໄດ້ສະແດງຄວາມຂອບໃຈມາຍັງ ທ່ານ ນາງ  ລໍເລັນ ເບວ ກໍຄືພະນັກງານທຸກທ່ານທີ່ໄດ້ຊອກຄົ້ນຫາແຫຼ່ງທຶນມາຊ່ວຍຊຸກຍູ້ເຂົ້າໃນວຽກງານໂຄງການສົ່ງເສີມເດັກນ້ອຍທຸກຄົນໄດ້ເຂົ້າຮຽນໃນຊັ້ນປະຖົມສຶກສາໄລຍະ II ແລະ ການສະໜັບສະໜູນຊ່ວຍເຫຼືອຈາກ ກະຊວງກະສິກໍາສະຫະລັດອາເມຣິກາ, ຫວັງຢ່າງຍິ່ງວ່າການຊ່ວຍເຫຼືອຄັ້ງນີ້ຈະບໍ່ແມ່ນເປັນການຊ່ວຍເຫຼືອຄັ້ງສຸດທ້າຍ ແລະ ໂອກາດໜ້າຈະໄດ້ຮັບການຊ່ວຍເຫຼືອຕື່ມອີກ. (ຂ່າວ-ພາບ: ຄຳແພງເພັດ ຂັນຕິວົງ)