ໃນ​ໂອກາດທີ່ຄະ​ນະ​ຜູ້​ແທນ​ອົງ​ການກວດ​ສອບ​ແຫ່ງລັດ ສ​ສ ຫວຽດ​ນາມ ນຳ​ໂດຍ ສະຫາຍ ​ໂງ ​ວັນ​ ຕວັນ ກໍາມະການ​ສູນ​ກາງ​ພັກ ຫົວໜ້າ​ອົງການ​ກວດ​ສອບ​ແຫ່ງ​ລັດ ສສ ຫວຽດນາມ ໄດ້​ເດີນ​ທາງ​ມາ​ຢ້ຽມ​ຢາມ ແລະ ເຮັດ​ວຽກ ຢູ່ ສ​ປ​ປ ລາວ ໃນ​ວັນ​ທີ 25 ພະ​ຈິກ​ ຜ່ານ​ມາ, ຄະ​ນະ​ຜູ້​ແທນ​ດັ່ງ​ກ່າວ ໄດ້​ໄປ​ຢ້ຽມ​ຢາມ ແລະ ​ເຮັດ​ວຽກ​ຢູ່​ ທະນາຄານ ​ຮ່ວມທຸລະກິດ ລາວ - ຫວຽດ ຈຳກັດ.

ດ້ວຍ​ບັນດາ​ໝາກຜົນ​ທີ່ ​ທະນາຄານ ​ຮ່ວມທຸລະກິດ ລາວ - ຫວຽດ ຈຳກັດ ບັນລຸ​ໄດ້, ສະຫາຍ ໂງ ​ວັນ ​ຕວັນ ​ໄດ້ກ່າວ​ຍ້ອງຍໍ​ຊົມ​ເຊີຍ ​ແລະ ຕີ​ລາຄາ​ສູງ​ບັນດາ​ຜົນງານ ​ແລະ ໝາກຜົນ​ທີ່​ທະນາຄານ LaoVietBank ຍາດມາ​ໄດ້​ໃນ​ໄລຍະ​ທີ່ຜ່ານ​ມາ. ສິ່ງ​ດັ່ງກ່າວ​ໄດ້​ປະກອບສ່ວນ​ສຳຄັນ​ເຂົ້າ​ໃນ​ການ​ເພີ່ມ​ພູນ​ຄູນ​ສ້າງ​ສາຍ​ພົວພັນ​ມິດຕະພາບ​ທີ່​ເປັນ​ມູນ​ເຊື້ອ​ອັນ​ດີງາມ​ລະຫວ່າງ​ ສປປ ລາວ - ສສ ຫວຽດນາມ. ນອກຈາກນັ້ນ ສະ​ຫາຍຫົວ​ໜ້າ​ອົງ​ການກວດ​ສອບ​ແຫ່ງ​ລັດ ສ​ສ ຫວຽດ​ນາມ ​ຍັງໄດ້ໃຫ້​ທິດຊີ້ນຳ ​ແລະ ຫວັງເປັນຢ່າງຍິ່ງ​ວ່າ ທະນາຄານ​ ຮ່ວມທຸລະກິດ ລາວ​-ຫວຽດ ຈຳກັດ ຈະສືບ​ຕໍ່​ພັດທະນາ​ຢ່າງເຂັ້ມ​ແຂງ​ ​ແລະ ຍືນ​ຍົງ, ສືບຕໍ່ປະກອບສ່ວນ​ສຳຄັນ​ເຂົ້າ​ໃນ​ການ​ພັດທະນາ​ເສດຖະກິດ-ສັງຄົມ ​ຂອງ ສ​ປ​ປ ​ລາວ, ເປັນ​ສັນຍາ​ລັກ​ນຳ​ໜ້າ​ແຫ່ງ​ການ​ຮ່ວມ​ມື​ລະຫວ່າງ​ ສປປ ລາວ - ສສ ຫວຽດນາມ.

ໃນ​ໂອ​ກາດ​ດັ່ງ​ກ່າວ, ​ຕາງໜ້າໃຫ້ກັບບັນດາຕົວແທນທຸລະກິດ BIDV ປະຈຳລາວ, ສະຫາຍ ​ເລ​ ຫງັອກ ​ເລິ່ມ ຜູ້ອຳນວຍການ​ໃຫຍ່ BIDV ​ຍັງໄດ້ກ່າວ​ສະແດງຄວາມ​ຂອບ​ໃຈມາຍັງ​ຄະນະ​ ​ແລະ ຢືນຢັນ​ວ່າຈະ​ສືບ​ຕໍ່​ຊີ້​ນຳ BIDV, LaoVietBank, ລວມທັງບັນດາຕົວແທນທຸລະກິດ BIDV ປະຈຳລາວ ເພື່ອສືບ​ຕໍ່​ປະຕິບັດ​ໜ້າ​ທີ່ດ້ານ​ເສດຖະກິດ, ການ​ເມືອງໃຫ້ດີທີ່ສຸດຕາມ​ການ​ມອບ​ໝາຍ​ ຂອງ​ ສອງ​ພັກ-ສອງ​ລັດ ສ​ສ ຫວຽດ​ນາມ ແລະ ສ​ປ​ປ ລາວ.

ຂ່າວ-ພາບ: LaoVietBank