ຂ່າວສານຊີອາໄອລາຍງານ ເມື່ອວັນທີ 29 ມັງກອນ ຜ່ານມາ, ໂດຍອີງຕາມໂຕເລກຂໍ້ມູນຫຼ້າສຸດຂອງທາງການຈີນ ສະແດງໃຫ້ເຫັນວ່າ: ການຂົນສົ່ງສິນຄ້າໃນທົ່ວປະເທດຈີນໄດ້ເຄື່ອນໄຫວເປັນລະບຽບດີ, ການຮັບ-ສົ່ງໄປສະນີດ່ວນໄດ້ເພີ່ມຂຶ້ນ 40,6% ເມື່ອທຽບໃສ່ວັນທີ 29 ທັນວາ ປີຜ່ານມາ.

ອີງຕາມໂຕເລກຂໍ້ມູນສັງລວມຈາກການຕິດຕາມຂອງຫ້ອງການໜ່ວຍນຳພາວຽກງານຮັກສາຄວາມໂລ່ງລ່ຽນດ້ານການຈໍລະຈອນສິນຄ້າຂອງລັດຖະບານຈີນ ໄດ້ສະແດງໃຫ້ເຫັນວ່າ ເມື່ອວັນທີ 29 ມັງກອນ ຜ່ານມານີ້, ການຂົນສົ່ງສິນຄ້າຜ່ານທາງລົດໄຟໃນທົ່ວປະເທດໄດ້ສືບຕໍ່ຮັກສາການເຄື່ອນໄຫວໃນລະດັບສູງ, ໄດ້ຂົນສົ່ງສິນຄ້າ 9.925.000 ໂຕນ ເພີ່ມຂຶ້ນ 0,39%, ລົດຂົນສົ່ງສິນຄ້າທີ່ຜ່ານທາງດ່ວນໃນທົ່ວປະເທດມີ 3.402.200 ຄັນ ເພີ່ມຂຶ້ນ 29,17%, ທ່າເຮືອຕ່າງໆໄດ້ສຳເລັດການຂົນຖ່າຍສິນຄ້າ 29.836.000 ໂຕນ ເພີ່ມຂຶ້ນ 1,2%, ສຳເລັດການຂົນຖ່າຍຕູ້ຄອນເທັນເນີ 628.000 ຕູ້ ຫຼຸດລົງ 6,9% ເມື່ອທຽບໃສ່ວັນທີ 29 ທັນວາປີຜ່ານມາ, ຮັບປະກັນຖ້ຽວບິນຂົນສົ່ງຜູ້ໂດຍສານ 14.101 ຖ້ຽວ, ຫຼຸດລົງ 0,2% ເມື່ອທຽບໃສ່ວັນທີ 29 ທັນວາປີຜ່ານມາ; ຮັບສົ່ງໄປສະນີດ່ວນປະມານ 322 ລ້ານຫໍ່ ແລະ ສຳເລັດການຂົນສົ່ງແລ້ວປະມານ 164 ລ້ານຫໍ່ ໄດ້ເພີ່ມຂຶ້ນ 40,6% ແລະ 53,3% ຕາມລຳດັບເມື່ອທຽບໃສ່ວັນທີ 29 ທັນວາປີຜ່ານມາ.