ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ລັດຖະບານຟີລິບປິນໄດ້ມີແຜນການເພີ່ມໄລຍະເວລາຂອງການໃຫ້ວີຊ່າອອນລາຍ ສຳລັບນັກທ່ອງທ່ຽວຈາກຕະຫຼາດເປົ້າໝາຍ ເພື່ອກະຕຸ້ນເສດຖະກິດຂອງປະເທດ. ທ່ານ ເຟີດິນານ ມາກອສ ຈູເນຍ ປະທານາທິບໍດີຟີລິບປິນ ໄດ້ມີຄຳສັ່ງໃຫ້ໜ່ວຍງານທີ່ກ່ຽວຂ້ອງດຳເນີນງານເພີ່ມເວລາການອອກວີຊ່າອີເລັກໂຕຣນິກ (E-Visa) ສຳລັບນັກເດີນທາງຈາກຕະຫຼາດທ່ອງທ່ຽວສຳຄັນໃນອາຊີ ເພື່ອກະຕຸ້ນການຟື້ນຕົວພາກການທ່ອງທ່ຽວ.

ຂະນະດຽວກັນ, ທ່ານ ເຟີດິນານ ມາກອສ ຈູເນຍ ຍັງໄດ້ແນະນຳໃຫ້ລວມກຸ່ມນັກເດີນທາງຊາວອິນເດຍໃນໂຄງການຍື່ນຂໍວີຊ່າເມື່ອເດີນທາງມາເຖິງ ແລະ ເພີ່ມເວລາວີຊ່າອີເລັກໂຕຣນິກສຳລັບພົນລະເມືອງຈີນ, ອິນເດຍ, ສ ເກົາຫຼີ ແລະ ຍີ່ປຸ່ນ ໂດຍລັດຖະບານຟີລິບປິນກຳລັງຮ່ວມມືພັດທະນາແຜນທາງເຕັກນິກຕ່າງໆເຊັ່ນ ການເຊື່ອມຕໍ່ຫຼາຍຮູບແບບ. ທັງນີ້, ໃນຖານະໂຕຂັບເຄື່ອນເສດຖະກິດທີ່ສຳຄັນ ອຸດສາຫະກຳການທ່ອງທ່ຽວມີສ່ວນສົ່ງເສີມໂຕເລກລວມຍອດຜະລິດຕະພັນພາຍໃນປະເທດ (GDP) ຂອງຟີລິບປິນເຖິງ 12,7% ເມື່ອປີ 2019 ແລະ ລັດຖະບານຟີລິບປິນໄດ້ຕັ້ງເປົ້າໝາຍດຶງດູດ ນັກທ່ອງທ່ຽວຕ່າງປະເທດໃຫ້ໄດ້ປະມານ 4,8 ລ້ານຄົນໃນປີນີ້.