ຂ່າວຕ່າງປະເທດລາຍງານ ເມື່ອວັນທີ 29 ມັງກອນ ຜ່ານມາ, ທ່ານ ໄຮ-ເພເທີ ໄມດິງເງີ (Heinz-Peter Meidinger) ປະທານສະມາຄົມຄູຂອງເຢຍລະມັນກ່າວວ່າ: ລະບົບການສຶກສາຂອງປະເທດກຳລັງປະເຊີນກັບພາວະຂາດແຄນຄູຄັ້ງໃຫຍ່ທີ່ສຸດໃນຮອບ 50 ປີ ຊຶ່ງເປັນບັນຫາທີ່ເກີດຂຶ້ນ ເພາະຈຳນວນຄູໃໝ່ຫຼຸດລົງຢ່າງຕໍ່ເນື່ອງໃນໄລຍະບໍ່ເທົ່າໃດທົດສະວັດທີ່ຜ່ານມາ.

ໂດຍອີງຕາມຜົນການສຳຫຼວດຈາກກຸ່ມກະຊວງສຶກສາ ແລະ ກະຊວງກິດຈະການວັດທະນະທຳລະດັບລັດຂອງເຢຍລະມັນ ຊຶ່ງດຳເນີນການໂດຍເຄືອຂ່າຍສື່ມວນຊົນທ້ອງຖິ່ນເຢຍລະມັນ (RND) ພົບວ່າ ປັດຈຸບັນເຢຍລະມັນມີຕຳແໜ່ງຄູວ່າງ 12.000 ອັດຕາ ແລະ ອາດຈະເພີ່ມສູງເຖິງ 40.000 ອັດຕາໃນອະນາຄົດມໍ່ໆນີ້ ໂດຍຫຼາຍໂຮງຮຽນຕ້ອງຍົກເລີກການຮຽນການສອນລ່ວງໜ້າ ເນື່ອງຈາກຂາດແຄນບຸກຄະລາກອນ. ສະຖາບັນເສດຖະກິດເຢຍລະມັນ (IW) ໄດ້ເຜີຍແຜ່ຜົນການສຶກສາທີ່ລະບຸວ່າ ເຢຍລະມັນຍັງປະເຊີນກັບພາວະຂາດແຄນແຮງງານທີ່ມີທັກສະດ້ານອື່ນອີກດ້ວຍ ຊຶ່ງເປັນຜົນມາຈາກພາວະປະຊາກອນສູງອາຍຸເພີ່ມຂຶ້ນ ແລະ ພາວະຂາດແຄນນີ້ມີທ່າອ່ຽງເພີ່ມຂຶ້ນອີກດ້ວຍ ພ້ອມທັງແນະນຳກ່ຽວກັບການຍື່ນຂໍ້ສະເໜີທີ່ໜ້າສົນໃຈໃຫ້ແກ່ທຸກຄົນລວມເຖິງຜູ້ສູງອາຍຸ ເພື່ອຊັກຊວນໃຫ້ມີການອາສາເຮັດວຽກດົນຂຶ້ນ ຫຼື ເຮັດວຽກນອກເວລາຖ້າຫາກຕ້ອງການ ຖ້າບໍ່ດັ່ງນັ້ນຈະມີວຽກຄ້າງເພື່ອລໍຖ້າຊຳລະສະສາງເພີ່ມຂຶ້ນຢ່າງຕໍ່ເນື່ອງ.

ເຖິງຢ່າງໃດກໍຕາມ, ເມື່ອທ້າຍປີ 2022 ຜ່ານມາ ທ່ານ ຮູເບີຕຸສ ເຮນ ລັດຖະມົນຕີກະຊວງແຮງງານຂອງເຢຍລະມັນກ່າວວ່າ ລັດຖະບານເບີລິນຍັງບໍ່ມີແຜນການເພີ່ມອາຍຸກະສຽນ ເນື່ອງຈາກການເຮັດແບບນັ້ນບໍ່ຖືກຕ້ອງ ແລະ ບໍ່ຍຸຕິທຳ ເພາະໝາຍເຖິງການຕັດເງິນບຳນານທີ່ແທ້ຈິງສຳລັບຄົນຈຳນວນຫຼາຍ ຊຶ່ງບໍ່ສາມາດເຮັດວຽກໄດ້ດົນຂະໜາດນັ້ນ. ອີກຢ່າງໜຶ່ງ, ລັດຖະບານເຢຍລະມັນກຳລັງພະຍາຍາມເພີ່ມການດຶງດູດແຮງງານຈາກຕ່າງປະເທດດ້ວຍການຫຼຸດຜ່ອນການຈ່າຍບ່ອນຢູ່ອາໄສລວມເຖິງຍັງຫຼຸດເກນລາຍໄດ້ສຳລັບບັດອະນຸຍາດເຮັດວຽກທີ່ຮຽກວ່າ ບລູ ກາດ (Blue card) ແລະ ຈະໃຊ້ບັດທີ່ຮ້ອງວ່າ ບັດໂອກາດ ສຳລັບຜູ້ມີສັກກະຍະພາບສູງ.