ວິທະຍຸກະຈາຍສຽງຫວຽດນາມລາຍງານວ່າ: ວັນທີ 27 ມັງກອນ 1973, ສັນຍາປາຣີ ກ່ຽວກັບການສິ້ນສຸດສົງຄາມ ແລະ ສ້າງສັນຕິພາບຢູ່ ຫວຽດນາມ ຄືນໃໝ່ ໄດ້ຮັບການລົງນາມຢູ່ນະຄອນຫຼວງປາຣີ, ດ້ວຍການປະກອບສ່ວນຂອງປະຊາຄົມຊາວຫວຽດນາມ ອາໄສຢູ່ຝຣັ່ງ. ເນື່ອງໃນໂອກາດສະເຫຼີມສະຫຼອງເຫດການປະຫວັດສາດ ຄົບຮອບ 50 ປີ, ເມື່ອບໍ່ດົນຜ່ານມາ ຢູ່ ນະຄອນຫຼວງປາຣີ, ສະມາຄົມຊາວ ຫວຽດນາມ ອາໄສຢູ່ ຝຣັ່ງ ໄດ້ສົມທົບກັບໜັງສືພິມ ເຍີນເຢີນ ຈັດງານວາງສະແດງພາບຖ່າຍດ້ວຍຫົວຂໍ້: “ສັນຍາ ປາຣີ 1973: ການປະກອບສ່ວນຂອງປະຊາຄົມອວ່າຍໜ້າເມືອຫາປະເທດຊາດ”. ງານວາງສະແດງໄດ້ເຕົ້າໂຮມຮູບຖ່າຍເອກະສານປະຫວັດສາດທີ່ລ້ຳຄ່າກ່ຽວກັບການເຄື່ອນໄຫວຂອງຄະນະຜູ້ແທນ ຫວຽດນາມ ຢູ່ປະເທດຝຣັ່ງ ແຕ່ປີ 1968 – 1973 ກໍຄືການປະກອບສ່ວນໂດຍກົງ ແລະ ທາງອ້ອມຂອງປະຊາຄົມຊາວ ຫວຽດນາມ ຢູ່ ຝຣັ່ງ ໃນການສະໜັບສະໜູນບັນດາຄະນະເຈລະຈາ.

ຂ່າວລະບຸວ່າ: ທ່ານ ເວືອງຫຶວເຍີນ ປະທານສະມາຄົມຊາວ ຫວຽດນາມ ອາໄສຢູ່ ຝຣັ່ງ, ໃຫ້ຮູ້ວ່່າ: ມາຮອດໄລຍະປັດຈຸບັນ, ພວກຂ້າພະເຈົ້າຍັງໄດ້ຖ່າຍທອດມູນເຊື້ອນັ້ນໃຫ້ກັບໄວໜຸ່ມ. ສຳລັບພວກຂ້າພະເຈົ້າແລ້ວ, ການສະເຫຼີມສະຫຼອງ 50 ປີແຫ່ງວັນເຊັນສັນຍາ ປາຣີ ແມ່ນສຳຄັນທີ່ສຸດ, ຍ້ອນແມ່ນການຖ່າຍທອດຄຸນຄ່າໃຫ້ຄົນຮຸ່ນຫຼັງ. ນອກຈາກນັ້ນ, ການເຄື່ອນໄຫວສະເຫຼີມສະຫຼອງນີ້ຍັງຊ່ວຍໃຫ້ບັນດາຜູ້ທີ່ບໍ່ໄດ້ເຂົ້າຮ່ວມເຫດການນີ້ ກໍຄືເພື່ອນມິດ ຝຣັ່ງ ມີຄວາມເຂົ້າໃຈໄລຍະປະຫວັດສາດສຳຄັນນີ້ຂອງປະຊາຄົມຊາວ ຫວຽດນາມ ອາໄສຢູ່ ຝຣັ່ງ ຈະແຈ້ງຂຶ້ນກວ່າເກົ່າອີກ.