ທ່ານນາງ ວິລະວອນ ພັນທະວົງ ກຳມະການຄະນະປະຈຳພັກ ຮອງຫົວໜ້າຄະນະໂຄສະນາອົບຮົມສູນກາງພັກ (ຄອສພ) ຜູ້ຊີ້ນໍາອົງການຈັດຕັ້ງມະຫາຊົນ ໄດ້ເຄື່ອນໄຫວຢ້ຽມຢາມພົບປະໂອ້ລົມ ໜັງສືພິມປະຊາຊົນ ສຽງຂອງສູນກາງພັກ ປະຊາຊົນ ປະຕິວັດລາວ ໃນວັນທີ 31 ມີນາ ນີ້ ທີ່ສຳນັກງານດັ່ງກ່າວ. ໂດຍໃຫ້ກຽດຕ້ອນຮັບຂອງ ທ່ານ ວັນໄຊ ຕະວິນຍານ ກຳມະການຄະນະພັກ ຮອງຫົວໜ້າ ຄອສພ ຫົວໜ້າບັນນາທິການໃຫຍ່ໜັງສືພິມປະຊາຊົນ, ມີບັນດາຮອງບັນນາທິການ, ຫົວໜ້າພະແນກ-ຮອງພະແນກ ພ້ອມດ້ວຍພະນັກງານ ໜັງສືພິມປະຊາຊົນ ເຂົ້າຮ່ວມ.

ໃນພິທີ ທ່ານ ວັນໄຊ ຕະວິນຍານ ໄດ້ຜ່ານບົດສະຫຼຸບສັງລວມໂດຍຫຍໍ້ວ່າ: ໃນປີ 2022 ຜ່ານມາໜັງສືພິມປະຊາຊົນ ໄດ້ມີຜົນງານຫຼາຍດ້ານ ເຮັດສຳເລັດໜ້າທີ່ການເມືອງຂອງຕົນໃນແຕ່ລະດ້ານໂດຍສະເພາະດ້ານການເມືອງແນວຄິດ ພາຍຫຼັງທີ່ໄດ້ມອບໂອນໜັງສືພິມປະຊາຊົນ ຂຶ້ນກັບ ຄອສພ ໃນວັນທີ 25 ສິງຫາປີ 2022 ຄະນະພັກ ໜັງສຶພິມປະຊາຊົນ ໄດ້ຖືເອົາວຽກງານການເມືອງ-ແນວຄິດເປັນບັນຫາສຳຄັນໃນການສຶກສາອົບຮົມການເມືອງ-ແນວຄິດໃຫ້ພະນັກງານ, ມີຄາມຮັບຜິດຊອບເຂົ້າໃຈຕໍ່ແນວທາງນະໂຍບາຍຂອງພັກ, ການນຳພາຂອງພັກ-ລັດຢ່າງເລິກເຊິ່ງ ມີແນວຄິດອຸ່ນອ່ຽນທຸ່ນທ່ຽງຕໍ່ທຸກສະພາບການທີ່ເກີດຂຶ້ນ, ພະນັກງານທຸກຄົນມີຄວາມບຸກບືນຫ້າວຫັນສຸມໃສ່ປະຕິບັດວຽກງານຂອງຕົນທີ່ການຈັດຕັ້ງມອບໝາຍໃຫ້, ມີລະບຽບວິໄນ, ມີຄຸນສົມບັດສິນທຳປະຕິວັດ, ມີຄຸນທາດການເມືອງ ພ້ອມທັງປະຕິບັດຄຳສັ່ງຕາມການຈັດຕັ້ງວາງອອກຢ່າງເຂັ້ມງວດ. ສະແດງອອກໃນການຂຽນບົດ, ຂຽນຂ່າວອອກໃນໜ້າໜັງສືພິມ, ເວັບໄຊ, ເຟສບຸກ ເປັນປົກກະຕິ, ສາມາດຕອບສະ ໜອງໄດ້ຕາມຄວາມຮຽກຮ້ອງຕ້ອງການຂອງສັງຄົມກໍຄືເປົ້າໝາຍຂອງພັກ-ລັດວາງອອກແຕ່ລະໄລຍະ. ຄະນະພັກ, ຄະນະບັນນາທິການມີຄວາມສາມັກຄີຊ່ວຍເຫຼືອຊຶ່ງກັນ ແລະ ກັນ, ໜັງສືພິມປະຊາຊົນ ໄດ້ສຸມໃສ່ໂຄສະນາໃຫ້ແກ່ວັນສຳຄັນຕ່າງໆຂອງພັກ-ຂອງຊາດ ກໍຄືກອງປະຊຸມຂັ້ນຕ່າງໆທັງພາຍໃນ-ຕ່າງປະເທດ, ນັບທັງສູນກາງ-ທ້ອງຖິ່ນຢ່າງອຸດົມສົມບູນ. ໃນປີ 2022 ຜ່ານມາໄດ້ອອກຂ່າວທັງໝົດ 11.027 ຂ່າວ, ຂ່າວພາຍໃນປະເທດ 4.300 ກວ່າຂ່າວ, ຂ່າວຕ່າງປະເທດ 855 ຂ່າວ, ຮູບ 5.000 ກວ່າຮູບ, ບົດນໍາ-ບົດຄວາມ, ແຈ້ງການ, ໂທລະເລກຕ່າງໆ 553 ບົດ, ລົງເວັບໄຊ ແລະ ເຟສບຸກ ໄດ້ມີການອັບເດດຂ່າວເປັນປົກກະຕິມີຫຼາຍສີສັນ, ໜັງສືພິມປະຊາຊົນ ມີທັງໝົດ 5 ພະແນກ, ມີພະນັກງານທັງໝົດ 44 ຄົນ ຍິງ 20 ຄົນ, ການເຮັດວຽກປະຕິບັດຕາມຫຼັກການລວມສູນປະຊາທິປະໄຕ ບຸກຄົນຮັບຜິດຊອບ.

ໃນໂອກາດນີ້, ທ່ານນາງ ວິລະວອນ ພັນທະວົງ ໄດ້ໃຫ້ທິດຊີ້ນໍາຕໍ່ ໜັງສືພິມປະຊາຊົນ 3 ບັນຫາໃຫຍ່ເປັນຕົ້ນຄື: ໃຫ້ເອົາໃຈໃສ່ປັບປຸງດ້ານບຸກຄະລາກອນ ປະຕິບັດຕາມພາລະບົດບາດຂອງຕົນ, ເອົາໃຈໃສ່ດ້ານວິຊາສະເພາະ, ດ້ານອົງການຈັດຕັ້ງມະຫາຊົນ ເພື່ອເຮັດໃຫ້ໜັງສືພິມປະຊາຊົນ ມີການຫັນປ່ຽນຢ່າງຕັ້ງໜ້າກ້າວສູ່ຄຸນນະພາບໃໝ່ມີຫຼາຍສີສັນ, ມີຄວາມອຸດົມສົມບູນດ້ານເນື້ອໃນຮູບການ, ຮັບປະກັນທັງປະລິມານ ແລະ ຄຸນນະພາບໃຫ້ສົມກັບເປັນກະບອກສຽງຂອງສູນກາງພັກຢ່າງແທ້ຈິງ.

ຂ່າວ: ພູວັນ, ພາບ: ຕຸໄລເພັດ