ໃນວັນທີ 29 ມີນາ ຜ່ານມານີ້ ຢູ່ສະໂມສອນເມືອງຮຸນ ແຂວງອຸດົມໄຊ ໄດ້ເປິດກອງປະຊຸມສາມັນຄົບຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ ເມືອງຮຸນ ເປີດກວ້າງຄັ້ງທີ 4 ສະໄໝທີ 10 ໂດຍການເປັນປະທານຂອງ ທ່ານ ນາງ ດາວິນ ວົງວິ່ນວີ່ ເລຂາຄະນະບໍລິຫານງານຊາວໜຸ່ມ ເມືອງຮຸນ, ເປັນກຽດເຂົ້າຮ່ວມໂດຍ ທ່ານ ຄຳຈັນ ວາບົວແສງ ເລຂາຄະນະບໍລິຫານງານຊາວໜຸ່ມແຂວງອຸດົມໄຊ, ມີແຂກຖືກເຊີນ ແລະ ພາກສ່ວນກ່ຽວຂ້ອງພາຍໃນເມືອງເຂົ້າຮ່ວມ.

ທ່ານ ນາງ ດາວິນ ວົງວິ່ນວີ່ ໄດ້ຜ່ານຮ່າງບົດສະຫຼຸບຕີລາຄາສະພາບການຈັດຕັ້ງປະຕິບັດວຽກງານຊາວໜຸ່ມ, ເຍົາວະຊົນປະຈໍາປີ 2022 ແລະ ທິດທາງແຜນການປີ 2023 ຕິດພັນກັບການຍ້ອງຍໍ ໃຫ້ບຸກຄົນທີ່ມີຜົນງານດີເດັ່ນ ທີ່ປະກອບສ່ວນເຂົ້າໃນການສ້າງສາພັດທະນາ ປະເທດຊາດປະຈຳປີ 2022. ຈາກນັ້ນ, ກອງປະຊຸມໄດ້ຜ່ານຂໍ້ຕົກລົງຮັບຮອງເອົາເມືອງຮຸນເປັນເມືອງກອງເຍົາວະຊົນ 3 ດີ 4 ຮູ້, ຮັບຮອງເອົາໜ່ວຍຊາວໜຸ່ມ ທົ່ວເມືອງ ເປັນໜ່ວຍ 4 ບຸກ, ຕົກລົງຮັບຮອງເອົາເມືອງຮຸນ ເປັນເມືອງ 4 ບຸກປະຈຳ ປີ 2022 ແລະ ມອບຫຼຽນກາລະນຶກ 65 ປີ ວັນສ້າງຕັ້ງຄະນະຊາວໜຸ່ມ ປະຊາຊົນ ປະຕິວັດລາວ ໃຫ້ເມືອງຮຸນ.

ໂອກາດດັ່ງກ່າວນີ້, ທ່ານ ຄຳຈັນ ວາບົວແສງ ໄດ້ໂອ້ລົມຕໍ່ກອງປະຊຸມ ກ່ອນອື່ນທ່ານໄດ້ຍ້ອງຍໍຊົມເຊີຍຜົນງານທີ່ໜ່ວຍຊາວໜຸ່ມເມືອງຍາດມາໄດ້ ແລະ ພ້ອມກັນເຮັດວຽກງານດ້ວຍຄວາມຮັບຜິດຊອບສູງ ພ້ອມດຽວກັນນີ້ທ່ານຮຽກຮ້ອງມາຍັງບັນດາໜ່ວຍຊາວໜຸ່ມທຸກພາກສ່ວນຈົ່ງພ້ອມກັນເພີ່ມທະວີສຶກສາອົບຮົມແນວຄິດການເມືອງໃຫ້ແຕ່ລະໜ່ວຍຊາວໜຸ່ມຮາກຖານ, ແຕ່ລະຂົງເຂດ ພ້ອມກັນເຄື່ອນໄຫວເຜີຍແຜ່ໂຄສະນາໃຫ້ຊາວໜຸ່ມແຕ່ລະຂົງເຂດໃຫ້ຫ່າງໄກຈາກບັນຫາຢາເສບຕິດ, ສືບຕໍ່ເອົາໃຈໃສ່ຕິດຕາມ, ກວດກາ, ຊຸກຍູ້ໃຫ້ອົງການຈັດຕັ້ງຊາວໜຸ່ມແຕ່ລະຂັ້ນເຄື່ອນໄຫວຕາມພາລະບົດບາດ, ສິດ, ໜ້າທີ່ຂອງຕົນ, ຊຸກຍູ້ຂະບວນການແຂ່ງຂັນ 4 ບຸກຢ່າງແຂງແຮງຕິດພັນກັບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນເປັນກ້າວໆ.

(ຂ່າວ-ພາບ: ອຳຄາ ສຸລິນທອງ)