ອົງການກວດກາແຫ່ງລັດ ແລະ ອົງການອ໋ອກສຟາມ ໄດ້ຮ່ວມລົງນາມບົດບັນທຶກ ຄວາມເຂົ້າໃຈ ໂຄງການສົ່ງເສີມຄວາມເຂັ້ມແຂງວຽກງານກວດກາ ແລະ ຕ້ານການສໍ້ລາດບັງຫຼວງ ຢູ່ ສປປ ລາວ ໃນວັນທີ 31 ມີນານີ້ ທີ່ ນະຄອນຫຼວງວຽງຈັນ. ລະຫວ່າງ ທ່ານ ບຸນມີ ແກ່ນມະນີ ຮອງຫົວໜ້າຫ້ອງການ ອົງການກວດກາແຫ່ງລັດ ແລະ ທ່ານ ທັດສະພອນ ບຸດສະຫຼິງ ຜູ້ອໍານວຍການ ອົງການອ໋ອກສຟາມ ໂດຍຊ້ອງໜ້າ ທ່ານນາງ ປິ່ງຄໍາ ລາຊະສິມມາ ຮອງປະທານອົງການກວດກາແຫ່ງລັດ, ທ່ານ ມາກ ກາລາເກີ ເອກອັກຄະລັດຖະທູດ ສະຫະພາບເອີຣົບ ປະຈໍາລາວ ພ້ອມດ້ວຍແຂກທີ່ກ່ຽວຂ້ອງ.
ອົງການປົກຄອງເມືອງຕະໂອ້ຍ ແຂວງສາລະວັນ ໄດ້ຈັດພິທີເປີດໂຄງການກໍ່ສ້າງເສັ້ນທາງເບຕົງ ເສີມເຫຼັກອ້ອມຂ້າງບ້ານເທສະບານເມືອງ, ມີຄວາມຍາວທັງໝົດ 1,200 ແມັດ, ກວ້າງ 4 ແມັດ ແລະ ໜາ 20 ຊັງຕີແມັດ. ພິທີໄດ້ຈັດຂຶ້ນໃນວັນທີ 30 ມີນາຜ່ານມານີ້, ໂດຍໃຫ້ກຽດເຂົ້າຮ່ວມຂອງທ່ານ ຈັນສະໝອນ ພົມມະແສງ ຄະນະປະຈໍາພັກແຂວງ ສໍາມາຊີກສະພາແຫ່ງຊາດຊຸດທີ X ຮອງປະທານສໍາມາຊີກສະພາປະຊາຊົນແຂວງ ຜູ້ຊີ້ນໍາຮອບດ້ານເມືອງຕະໂອ້ຍ, ທ່ານ ຄໍາສະໄຫວ ວິລະກອນ ກຳມະການພັກແຂວງ ເລຂາຄະນະບໍລິຫານງານພັກເມືອງຕະໂອ້ຍ ປະທານສະມາຊີກສະພາປະຊາຊົນແຂວງປະຈໍາເມືອງ, ມີພາກສ່ວນກ່ຽວຂ້ອງ ແລະ ພໍ່ແມ່ປະຊາຊົນບ້ານເທສະບານເຂົ້າຮ່ວມ.
ເມືອງພຽງ ແຂວງໄຊຍະບູລີ ເຜີຍແຜ່ຄຳສັ່ງນາຍົກລັດຖະມົນຕີ ເລກທີ 16/ນຍ ວ່າດ້ວຍການກວດກາສະກັດກັ້ນ ແລະ ການແກ້ໄຂການຂາຍຫວຍທີບໍ່ຖືກຕ້ອງຕາມກົດໝາຍ, ລະບຽບການ ແລະ ນິຕິກຳອື່ນໆ ທີ່ກ່ຽວຂ້ອງກັບຫວຍພັດທະນາ ຊຶ່ງໄດ້ຈັດຂຶ້ນໃນວັນທີ 31 ມີນານີ້ ທີຫ້ອງປະຊຸມຂອງເມືອງ ໂດຍການເປັນປະທານຂອງທ່ານ ກອງໄຊ ໄຊຍະລາດ ກຳມະການປະຈຳພັກເມືອງ ຮອງປະທານຄະນະກຳມະການປົກຄອງເມືອງ, ມີທ່ານ ສຸກສະເຫຼີມ ເຮືອງຄຳໄຊ ຮອງຫົວໜ້າພະແນກການເງິນແຂວງໄຊຍະບູລີ ພ້ອມທິມງານຂອງແຂວງ ແລະ ພາກສ່ວນກ່ຽວຂ້ອງອ້ອມຂ້າງເມືອງ ເຂົ້າຮ່ວມ.
ກອງປະຊຸມຄົບຄະນະບໍລິຫານງານພັກແຂວງວຽງຈັນ ຄັ້ງທີ 3 ສະໄໝທີ VII ໄດ້ໄຂຂຶ້ນໃນວັນທີ 31 ມີນານີ້, ໂດຍການເປັນປະທານຂອງ ສະຫາຍ ພູທະນູເພັດ ໄຊສົມບັດ ກຳມະການສູນກາງພັກ ເລຂາຄະນະບໍລິຫານງານພັກແຂວງວຽງຈັນ, ມີຮອງເລຂາຄະນະບໍລິຫານງານພັກແຂວງ, ບັນດາສະຫາຍ ຄະນະປະຈໍາພັກແຂວງ, ກໍາມະການພັກແຂວງ, ເລຂາພັກເມືອງ, ເລຂາຄະນະພັກຮາກຖານ-ໜ່ວຍພັກຮາກຖານ ພະແນກການ, ອົງການອ້ອມຂ້າງແຂວງ ເຂົ້າຮ່ວມ.
