 |
ທ່ານ ພັທ ບຸນທະວີ ຖານະວັນ ກຳມະການພັກເມືອງ ຫົວໜ້າການເມືອງ ກອງບັນຊາການທະຫານເມືອງໄດ້ຂຶ້ນຜ່ານບົດສະຫຼຸບວຽກງານຮອບດ້ານປະຈຳປີ 2025 ແລະ ທິດທາງແຜນການປີ 2026 ບາງຕອນທ່ານໃຫ້ຮູ້ວ່າ: ຕະຫຼອດໄລຍະຜ່ານມາ, ຄະນະພັກ, ຄະນະບັນຊາ, ພະນັກງານ-ນັກຮົບ ໄດ້ເອົາໃຈໃສ່ປະຕິບັດໜ້າທີ່ວຽກງານວິຊາສະເພາະຂອງຕົນສະແດງອອກຄື: ໄດ້ສົມທົບທີມງານຂອງເມືອງລົງກໍ່ສ້າງຮາກຖານການເມືອງຮອບດ້ານ, ຕິດພັນກັບການສ້າງກອງຮ້ອຍກອງຫຼອນແບບຢ່າງ, ສ້າງບ້ານປ້ອງກັນຊາດເຂັ້ມແຂງ, ຄອບຄົວປ້ອງກັນຊາດເຂັ້ມແຂງ, ໄດ້ກວດກາປະເມີນຄືນຄອບຄົວ ບ້ານປ້ອງກັນຊາດເຂັ້ມແຂງຈໍານວນ 78 ບ້ານ, ຍັງຄ້າງ 1 ບ້ານຄື: ບ້ານຫ້ວຍຊໍາອໍ້ ແລະ ຄອບຄົວປ້ອງກັນຊາດ ເຂັ້ມແຂງຈໍານວນ 15,981 ຄອບຄົວ, ໄດ້ 14,663, ຍັງຄ້າງ 1,318 ຄອບຄົວ, ໄດ້ຈັດຕັ້ງກໍາລັງປະຈໍາການກຽມພ້ອມສູ້ຮົບຕະຫຼອດ 24 ຊົ່ວໂມງ ແລະ ຫັນພາວະປົກກະຕິຂຶ້ນສູ່ພາວະຄົບຖ້ວນແຕ່ລະມື້, ມີຄະນະປະຈຳການ, ສິດປະຈຳການ, ພາຫະນະປະຈຳການ ຕິດຕາມສະພາບຕ່າງໆທີ່ເກີດຂຶ້ນລາຍງານໃຫ້ຂັ້ນເທິງເປັນປົກກະຕິ, ສ້າງແຜນຊີ້ນໍາ ປກຊ-ປກສ ບ້ານເຄື່ອນໄຫວໄລຍະສັ້ນໄດ້ 12 ຄັ້ງ ມີ 3,744 ແຮງງານ, ໄລຍະຍາວ 3 ຄັ້ງ ມີ 268 ແຮງງານ, ສົມທົບ ປກສ ເມືອງ, ປກຊ-ປກສ ບ້ານປອ້ງກັນວັນບຸນສໍາຄັນຂອງຊາດ, ຂອງພັກ, ສະຖານທີ່ສໍາຄັນຕ່າງໆໄດ້ທັງໝົດ 15 ຄັ້ງມີ 620 ແຮງງານ, ທົ່ວເມືອງມີກອງຫຼອນທັງໝົດ 1,502 ສະຫາຍ, ມີ 11 ກອງຮ້ອຍ, ມີ 44 ໝວດ, ມີ 180 ໝູ່, ມີ 35 ໝູ່ເອກະລາດທຽບໃສ່ພົນລະເມືອງທັງໝົດ 1.91%, ພ້ອມນີ້ວຽກງານປູກຝັງ-ລ້ຽງສັດ, ໄດ້ປູກມັນຕົ້ນ 1 ເຮັກຕາ, ປູກພືດຜັກ, ໝາກເຜັດ, ເຂືອຕາມລະດູການເຂົ້າເຮືອນຄົວລວມຈໍານວນໜຶ່ງ ແລະ ອື່ນໆ.
ໂອກາດນີ້, ທ່ານ ຈັນເພັງ ອູ່ທອງຄຳ ໄດ້ເນັ້ນໜັກໃຫ້ເພີ້ມທະວີສຶກສາອົບຮົມການເມືອງ-ແນວຄິດໃຫ້ຖັນແຖວພະນັກງານ, ນັກຮົບ, ປະຊາຊົນບັນດາເຜົ່າໃຫ້ມີຄວາມໜັກແໜ້ນທາງດ້ານການເມືອງ, ມີຄວາມເຊື່ອໝັ້ນຕໍ່ແນວທາງນະໂຍບາຍ ແລະ ການນໍາພາຂອງພັກ-ລັດ, ສ້າງໃຫ້ໄດ້ຄວາມສາມັກຄີເປັນປຶກແຜ່ນຂອງຄະນະພັກ-ຄະນະບັນຊາ, ພະນັກງານ, ນັກຮົບ, ຂະແໜງການທຸກພາກສ່ວນພາຍໃນກົມກອງ.
(ຂ່າວ-ພາບ: ສົມພົງ ສີສະຫວັດ)
ຄໍາເຫັນ