 |
ກອງປະຊຸມ ໄດ້ຍົກໃຫ້ເຫັນເຖິງຄວາມຈຳເປັນອັນຮີບດ່ວນ ເນື່ອງຈາກປັດຈຸບັນ ສປປ ລາວ ໄດ້ກວດພົບການລະບາດຂອງພະຍາດໂປລິໂອຄືນໃໝ່ ໂດຍຫຼ້າສຸດໄດ້ພົບຜູ້ປ່ວຍ 1 ກໍລະນີ ຢູ່ເມືອງຊົນນະບູລີ ແຂວງສະຫວັນນະເຂດ ແລະ ພົບເຊື້ອໃນເດັກທີ່ມີສຸຂະພາບແຂງແຮງອີກ 2 ຄົນ. ພະຍາດໂປລິໂອເປັນພະຍາດທີ່ອັນຕະລາຍ, ບໍ່ມີຢາປິ່ນປົວໃຫ້ຫາຍຂາດ ແລະ ສາມາດເຮັດໃຫ້ເດັກພິການລ່ອຍແຫຼວຕະຫຼອດຊີວິດ. ດັ່ງນັ້ນ, ການຈັດຕັ້ງຂະບວນການ ວສຊ ຈຶ່ງເປັນມາດຕະການດຽວທີ່ຈະຊ່ວຍສ້າງພູມຄຸ້ມກັນໝູ່ ແລະ ປົກປ້ອງລູກຫຼານໃຫ້ປອດໄພ.
 |
ສຳລັບການບໍລິການດ້ານສາທາລະນະສຸກທົ່ວເມືອງຫຼວງນໍ້າທາ ແມ່ນມີຄວາມພ້ອມຮອບດ້ານ ຊຶ່ງປະກອບມີໂຮງໝໍຂັ້ນເມືອງ 1 ແຫ່ງ, ໂຮງໝໍຂັ້ນແຂວງ 3 ແຫ່ງ ແລະ ສຸກສາລາ 6 ແຫ່ງ ຊຶ່ງຈະຮັບຜິດຊອບຄຸ້ມຄອງທັງໝົດ 78 ບ້ານ ແລະ ໄດ້ກຳນົດຈຸດໃຫ້ບໍລິການວັກຊີນທັງໝົດ 111 ຈຸດ ເພື່ອໃຫ້ບໍລິການແກ່ເດັກກຸ່ມເປົ້າໝາຍທີ່ມີອາຍຸລຸ່ມ 5 ປີ (0 ຫາ 59 ເດືອນ). ໃນທົ່ວເມືອງມີເດັກກຸ່ມເປົ້າໝາຍທັງໝົດຈໍານວນ 7,350 ຄົນ. ແຜນການຈະຈັດຕັ້ງປະຕິບັດໃນຄັ້ງນີ້ ຈະແບ່ງອອກເປັນ 2 ຮອບໃຫຍ່ ຄື: ຮອບທີ 1: ວັນທີ 2 - 11 ມີນາ 2026 ແລະ ຮອບທີ 2: ວັນທີ 23 ມີນາ - 1 ເມສາ 2026 ໂດຍເດັກນ້ອຍໃນເກນອາຍຸເປົ້າໝາຍທຸກຄົນ ຕ້ອງໄດ້ຮັບການຢອດວັກຊີນໂປລິໂອ (bOPV) ຈຳນວນ 2 ຢອດ, ເຖິງແມ່ນວ່າຈະເຄີຍໄດ້ຮັບວັກຊີນຮອບປົກກະຕິມາແລ້ວກໍຕາມ ແລະ ໃນບາງເຂດສ່ຽງ ຍັງຈະມີການໃຫ້ວັກຊີນປ້ອງກັນໝາກແດງ-ໝາກເຢຍ (MR) ຕື່ມອີກ.
ເພື່ອໃຫ້ບັນລຸຄາດໝາຍການປົກຄຸມວັກຊີນໃຫ້ໄດ້ຫຼາຍກວ່າ 95%, ທີມງານແພດໝໍ ຈະນຳໃຊ້ຍຸດທະສາດການສື່ສານ ແລະ ປຸກລະດົມຊຸມຊົນແບບແຈ້ງລ່ວງໜ້າ 7 ວັນ, ເຕືອນ 3 ວັນ ແລະ ຢືນຢັນ 1 ວັນກ່ອນລົງພື້ນທີ່ ໃນຮູບແບບການໃຫ້ບໍລິການຈະມີທັງຈຸດຄົງທີ່ໃນຕອນເຊົ້າ ແລະ ລົງເຄື່ອນທີ່ແຕ່ລະຄົວເຮືອນໃນຕອນບ່າຍ ເພື່ອຄົ້ນຫາເດັກທີ່ຕົກຄ້າງ ພ້ອມທັງມີການໝາຍເລັບມືເພື່ອເປັນສັນຍາລັກ ແລະ ຕິດຕາມອາການພາຍຫຼັງຮັບວັກຊີນ 15-30 ນາທີ.
 |
ຕອນທ້າຍ, ປະທານກອງປະຊຸມໄດ້ຮຽກຮ້ອງໃຫ້ທຸກພາກສ່ວນ ຈົ່ງຮ່ວມແຮງຮ່ວມໃຈກັນ ເອົາໃຈໃສ່ໃນການປະສານງານ ແລະ ຄຸ້ມຄອງວັກຊີນໃຫ້ໄດ້ມາດຕະຖານລະບົບເຢັນ. ພ້ອມທັງຮຽກຮ້ອງໃຫ້ພໍ່ແມ່ຜູ້ປົກຄອງເດັກກຸ່ມເປົ້າໝາຍທຸກທ່ານ ຈົ່ງໃຫ້ຄວາມຮ່ວມມື ແລະ ພາລູກຫຼານຂອງຕົນມາຮັບວັກຊີນຕາມວັນ ແລະ ເວລາທີ່ກຳນົດ ເພື່ອຮ່ວມກັນກຳຈັດພະຍາດໂປລິໂອໃຫ້ໝົດໄປຈາກເມືອງຫຼວງນ້ຳທາ ກໍຄືໃນຂອບເຂດທົ່ວປະເທດ.
(ແຫຼ່ງຂ່າວ: ເມືອງຫຼວງນໍ້າທາ)
ຄໍາເຫັນ