 |
ທ່ານ ຈັນເພັງ ອູ່ທອງຄຳ ຮອງເລຂາພັກເມືອງ ປະທານຄະນະກຳມະການປົກຄອງເມືອງໄດ້ຜ່ານບົດສະຫຼຸບການຖອດຖອນບົດຮຽນບາງຕອນທ່ານໃຫ້ຮູ້ວ່າ: ເມືອງໄຊຍະບູລີ ໄດ້ກໍານົດໜ່ວຍປ່ອນບັດເລືອກຕັ້ງອອກເປັນ 111 ໜ່ວຍຄື: ຮາກຖານບ້ານ 78 ບ້ານ ມີ 100 ໜ່ວຍປ່ອນບັດ ໂດຍກໍານົດເປັນບ້ານທີ່ມີ 4 ໜ່ວຍເລືອກຕັ້ງມີ 1 ບ້ານ (ນາຫຼາ), ບ້ານທີ່ມີ 2 ໜ່ວຍເລືອກຕັ້ງມີ 20 ບ້ານ, ບ້ານທີ່ມີໜ່ວຍເລືອກຕັ້ງ 1 ໜ່ວຍມີ 57 ບ້ານ, ໜ່ວຍປ່ອນບັດເຄື່ອນທີ່ 1 ໜ່ວຍ, ໜ່ວຍກອງພົນທະຫານຮາບທີ II ຈໍານວນ 2 ໜ່ວຍ, ໜ່ວຍກອງພັນໃຫຍ່ 202 ຈໍານວນ 1 ໜ່ວຍ, ໜ່ວຍກອງບັນຊາການທະຫານແຂວງ 3 ໜ່ວຍ, ໜ່ວຍກອງບັນຊາການ ປກສ ແຂວງ 2 ໜ່ວຍ, ໜ່ວຍກອງບັນຊາການທະຫານເມືອງ 1 ໜ່ວຍ, ໜ່ວຍກອງບັນຊາການ ປກສ ເມືອງ 1 ໜ່ວຍ. ຜູ້ມີສິດປ່ອນບັດເລືອກຕັ້ງທັງໝົດ 52,695 ຄົນ ຍິງ 25,461 ຄົນ, ຜູ້ມາປ່ອນຕົວຈິງ 53,854 ຄົນ ຍິງ 25,641 ຄົນ, (ເພີ່ມຂຶ້ນ 1,159 ຄົນ ຍິງ 512 ຄົນ, ສາເຫດເພີ່ມ ຍ້ອນຜູ້ໄປອອກແຮງງານ, ນັກສຶກສາຢູ່ຕ່າງເມືອງ, ຕ່າງແຂວງ, ຕ່າງປະເທດ ກັບຄືນມາບ້ານ), ການຈັດຕັ້ງ ແມ່ນໄດ້ປະຕິບັດຕາມ 5 ບາດກ້າວຄື: ການກະກຽມເອກະສານພື້ນຖານ ແລະ ແຜນການຕ່າງໆ, ຈັດກອງປະຊຸມເຊື່ອມຊຶມເອກະສານໃຫ້ພະນັກງານຫຼັກແຫຼ່ງຂອງເມືອງ, ດໍາເນີນຂະບວນການຕ່າງໆ ໃນການເລືອກຕັ້ງ, ດໍາເນີນການປ່ອນບັດເລື້ອກຕັ້ງ, ຈັດກອງປະຊຸມສະຫຼຸບຖອດຖອນບົດຮຽນ. ຈາກນັ້ນ, ໃນກອງປະຊຸມຜູ້ເຂົ້າຮ່ວມກໍໄດ້ປະກອບຄຳຄິດເຫັນຢ່າງກົງໄປກົງມາ ໂດຍສະເພາະແມ່ນໂຄງປະກອບ, ຂັ້ນຕອນ, ວິທີການ, ຜົນໄດ້ຮັບຂອງການປະຕິບັດວຽກງານ, ດ້ານດີ, ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ໃນການຈັດຕັ້ງປະຕິບັດວຽກງານດັ່ງກ່າວໃນຄັ້ງນີ້ ເພື່ອນຳໄປປັບປຸງ ແລະ ເປັນບົດຮຽນໃນການຈັດຕັ້ງປະຕິບັດຄັ້ງຕໍ່ໄປໃຫ້ດີກວ່າເກົ່າ.
(ຂ່າວ-ພາບ: ສົມພົງ ສີສະຫວັດ)
ຄໍາເຫັນ