ພິທີຕັກບາດຖວາຍທານແດ່ພະສົງ 15 ອົງເນື່ອງໃນໂອກາດສ້າງຂະບວນການຕ້ອນຮັບການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະມາຊິກສະພາປະຊາຊົນ ແຂວງ ຊຸດທີ V ໄດ້ຈັດຂຶ້ນໃນຕອນເຊົ້າຂອງວັນ ອາທິດທີ 22 ກຸມພານີ້ທີ່ວັດຫຼວງ ນະຄອນປາກເຊ ແຂວງຈຳປາສັກ ໂດຍໃຫ້ກຽດເຂົ້າຮ່ວມຂອງ ທ່ານ ສອນໄຊ ສີພັນດອນ ກຳມະການກົມການເມືອງສູນກາງພັກນາຍົກລັດຖະມົນຕີ ພ້ອມພັນລະຍາ.ມີທ່ານ ອາລຸນໄຊ ສູນນະລາດ ກຳມະການສູນກາງພັກເລຂາຄະນະ ບໍລິຫານງານພັກແຂວງຈໍາປາສັກ ພ້ອມພັນລະຍາ; ມີບັນດາທ່ານ ຜູ້ສະໝັກຮັບເລືອກຕັ້ງສະມາຊິກສະພາແຫ່ງຊາດຊຸດທີ X ເຂດເລືອກຕັ້ງທີ 15 ແຂວງຈໍາສັກ ແລະ ຜູ້ສະໝັກຮັບເລືອກຕັ້ງສສຂ ຊຸດທີ5ເຂດເລືອກຕັ້ງນະຄອນປາກເຊ,ພ້ອມດ້ວຍຄະນະພັກ, ຄະນະນຳຂອງແຂວງ ຕະຫຼອດຮອດພຸດທະສາສະນິກະຊົນເຂົ້າຮ່ວມ.
ໃນພິທີທ່ານ ສອນໄຊ ສີພັນດອນ ພ້ອມຄະນະນຳໄດ້ໃຫ້ກຽດໄຕ້ທຽນໄຊ ໄຫວ້ພະລັດຕະນະໄຕຈາກນັ້ນ ພະອາຈານໃຫຍ່ ມະຫາສຸວັນ ຈັນທະລາດ ປະທານ ອພສ ແຂວງ ໄດ້ນຳພາເຂົ້າສູ່ພິທີທາງສະສະໜາ ຢ່າງເປັນທາງການ ຄືເທດສະໜາໃຫ້ພອນ ແລະ ຢາດນ້ຳຖວາຍທານແດ່ພະສົງ ເພື່ອເປັນສີລິມຸງຄຸນ ຈາກນັ້ນການນຳຂັ້ນສູງພ້ອມດ້ວຍພຸດທະສາສະນິກະຊົນກໍໄດ້ຮ່ວມກັນຕັກບາດຊຶ່ງຈຸດປະສົງໃນການສ້າງກິດຈະກຳຕັກບາດໃນຄັ້ງນີ້ກໍເພື່ອເປັນການສະເຫຼີມສະຫຼອງໃຫ້ແກ່ການເລືອກຕັ້ງສະມາຊິສະພາແຫ່ງຊາດ ຊຸດທີ X ເຂດເລືອກຕັ້ງທີ 15 ແຂວງຈຳປາສັກ ແລະ ສະມາຊິກສະພາປະຊາຊົນແຂວງຊຸດທີ V ໃຫ້ສົມກັບເປັນບຸນປາງໃຫຍ່ຂອງປວງຊົນລາວທັງຊາດ.
(ຂ່າວ: ນ. ປະພິດ ສີສົມບູນ)
ຄໍາເຫັນ